ललितपुर,५ चैत्र । जिल्ला प्रशासन कार्यालय ललितपुरले पूर्ण रुपमा अशक्त र तथा अपाङगता भएका नागरिकलाई घरमै गएर नागरिकता वितरण गर्ने कार्य थालनी गरेको छ । प्रशासनले नख्खु निवासी १७ वर्षीया कृषा खड्गीलाई घरमै गएर नागरिकता वितरण गरी सो कार्यको शुरुआत गरेको हो। खान,बस्न समेत नसक्ने खड्गीलाई प्रमुख जिल्ला अधिकारी तुलसीबहादुर श्रेष्ठले घरमै पुगेर नागरिकता प्रदान गरे । नागरिकता लिइरहँदा कृषाको मन दंग थियो ।

नागरिकता वितरण गर्न प्रमुख जिल्ला अधिकारी श्रेष्ठसहित सहायक प्रमुख जिल्ला अधिकारी कल्पना घिमिरे नेपाल, प्रशासकीय अधिकृत सुजन फागो लिम्बु र नागरिकता फाँटका कर्मचारीको टोलीसहित नख्खु पुगेको थिए। छोरीको नागरिकताको लागि बाबु कृष्णप्रसाद खड्गी विहीबार मानभवनस्थित कार्यालय पुगेका थिए । उनले छोरी पूर्ण अशक्त रहेकोले जनाउँदै सनाखतका लागि कार्यालय आउन र ल्याउन नसकिने कुरो राखेपछि प्रजिअ श्रेष्ठले घरमै गएर सनाखत गरी नागरिकता वितरण गर्ने निर्णय गरेको पारिबारिक श्रोतले जनाएको छ ।

प्रशासनको टोली घरमै आएर नागरिकता वितरण गरेपछि परिवारमा खुशी छाएको थियो। छोरीको अवस्था बुझेर प्रशासनको टोेली घरमै आएर नागरिकता वितरण गरेको देख्दा खु्शीको महशुस गरेको कृष्णप्रसादले बताए । ‘ नागरिकताको प्रमाणपत्र सबै प्रकारको अधिकारको आधारभुत दस्तावेज हो।कोही पनि नेपाली नागरिक नागरिकता पाउनबाट वञ्चित हुनुहुँदैन।त्यसैले क वर्गका अपाङगता भएका नागरिकलाई घरमै गएर नागरिकता वितरण गरिने छ’, प्रमुख जिल्ला अधिकारी श्रेष्ठले भने ।

२०६३ मंसिर ४ गते जन्मिएका खड्गीमा सात महिना भएपछि हात खुट्टा र जीउ चलाउन नसक्ने समस्या देखिएको आमा शोभा खड्गीले बताइन । त्यसयतादेखि २४ घण्टा ओछ्यानमा पल्टिएर छोरीले जीवन बिताउनुपरेको छ। एक्लै खान, पिउन, दिशा, पिशाब समेत गर्न सक्दैन । ’ शोभाले भन्नुभयो ‘ शरीरको तौलको कारण उपचारको लागि बाहिर लाने र ल्याउन समेत गर्न सकेको छैन ।’ खड्गीको तौल ६५ किलो रहेको।उपचारका लागि अनेक प्रयास गर्दा पनि छोरीको स्वास्थ्य सुधार नआएको पनि परिवारको भनाई रहेको छ।

अपाड्डता भएका कारण छोरीलाई पढाउन र लेखाउन नसकेको परिवारका सदस्यहरु बताउँछन्। तोकिएको कागजात उपलब्ध गराउँदा पनि नागरिकता वितरणमा अनावश्क ढिलासुस्ती गर्ने गरेको, भएको प्रमाण नहेर्ने र नभएको प्रमाणमात्रै खोजिरहने गुनासो आएको जनाउँदै प्रशासनले सेवाप्रवाहलाई चुस्त दुरुस्त बनाउने बताइएको छ ।