काठमाडौं । राष्ट्रिय स्वतन्त्र पार्टीले मदन खड्काको नेतृत्वमा कर्णाली प्रदेश समिति गठन गरेको छ। पार्टी सभापति रवि लामिछानेको उपस्थितिमा भदौ १५ गते शनिबार सुर्खेतको वीरेन्द्रनगरमा भएको भेलाले सर्वसम्मत रुपमा खड्कको नेतृत्वमा ९ सदस्यीय समिति गठन गरेको हो।

भेलाबाट प्रेम बोहरा उपप्रमुख, ललित चन्द महासचिव, हरि अधिकारी सचिव र स्नेहा उपाध्याय कोषाध्यक्ष चयन भएका छन्। बुधे बुढा, ऋषिराम पाण्डे, निर्मला सापकोटा, अविसरा सुवेदी र सुनिता विक समितिको सदस्य छानिएका छन्। प्रदेश प्रमुखका लागि ६ र सदस्यका लागि १७ जनाको उम्मेदवारी परे पनि आपसी सहमतिमै पदाधिकारी र सदस्य छानिएको रास्वपाका कार्यवहाक महामन्त्री कविन्द्र बुर्लाकोटीले जानकारी दिए ।

केन्द्रीय सभापति रवि लामिछाने र कार्यवाहक महामन्त्री बुर्लाकोटीलगायत नेताको उपस्थितिमा भेलामार्फत प्रदेश समिति गठन गरिएको हो। विशेष राजनीतिक र सांगठनिक अभियान आवश्यक रहेको निश्कर्षका साथ रास्वपाको केन्द्रीय समितिले २०८० फागुन ७ गते कर्णाली प्रदेशका सबै समिति विघटन गरेको थियो।

६ महिनाको सांगठनिक रिक्ततापछि रास्वपाले प्रदेश समिति हुँदै कर्णालीमा जिल्ला, पालिका र वडा समिति गठन सुरुवात गरेको पार्टीका कार्यवाहक प्रवक्ता मनिष झाले बताए । यसका साथै अन्य प्रदेशमा पनि प्रदेश भेला आयोजना गर्दै राष्ट्रिय भेलाको लागि उत्साहजनक सहभागिताको वातावरण बनाउदै जाने अभियानको योजना रहेको उनको भनाई छ ।